काठमाडौं, १९ जेठ । नेपाली कांग्रेसका महामन्त्री गगनकुमार थापाले हित विपरीतका निर्णय हुँदा पार्टी कमजोर बन्ने बताएका छन् । उनले अहिले केन्द्रदेखि स्थानीय तहसम्म कांग्रेस सरकारमा भए पनि २०८४ सालको चुनाव हारिने डर देखिएको समेत बताएका छन् ।
शुक्रबार काठमाडौंमा भएको नेपाल प्रेस युनियन उपत्यका प्रतिष्ठानको प्रथम अधिवेशनलाई सम्बोधन गर्दै महामन्त्री थापाले रेशम चौधरीलगायतको आममाफी, नागरिकता विधेयक र सांसद विकास कोषजस्ता अलोकप्रिय विषयमा कांग्रेस सभापति शेरबहादुर देउवा एक्लैले निर्णय गरेको भन्दै त्यस्ता निर्णयले पार्टी कमजोर बन्ने बताए ।
कांग्रेससमेत सहभागी रहेको सरकारले एक पछि अर्को गलत क्रियाकलाप गरिरहेको भन्दै महामन्त्री थापाले अब पार्टीमा हुने त्यस्ता निर्णयमा सहेर नबस्नेसमेत बताएका छन् ।
नागरिकता विधेयकको प्रमाणीकरण प्रक्रिया, नागरिक उन्मुक्ति पार्टीका नेता चौधरीलाई आममाफी लगायतका कार्य गलत भएको थापाको भनाई छ । पार्टीले हित विपरीत निर्णय गर्न नहुने उनले बताए ।
