काठमाडौं, ५ चैत । नेकपा एकीकृत समाजवादी पार्टीले नेता घनश्याम भुसाललाई महासचिव बनाउने निर्णय गरेको छ ।
आइतबार पार्टी केन्द्रीय कार्यालयमा बसेको ५३ औँ सचिवालय बैठकले भुसाललाई महासचिव बनाउने निर्णय गरेको हो ।
त्यस्तै, महासचिव रहेका बेदुराम भुसाललाई उपाध्यक्ष बनाउने निर्णय भएको प्रवक्ता जगन्नाथ खतिवडाले जानकारी दिए ।
उनले पार्टीको महासचिव पदमा कार्यरत बेदुराम भुसाललाई उपाध्यक्षमा र रिक्त महासचिव पदमा घनश्याम भुसाललाई मनोनयन गर्ने सर्वसम्मत निर्णय गरिएको बताए ।
बैठकले पार्टीका चारैजना उपाध्यक्षलाई केन्द्रीय सचिवालय सदस्य मनोनीत गरिएको उनले बताए । उनले पार्टीका सबै उपाध्यक्ष अब केन्द्रीय सचिवालयमा रहने र सचिवालय सदस्य संख्या १९ पुगेको जानकारी दिए ।
भुसाल गत २९ पुसमा नेकपा एकीकृत समाजवादीमा आबद्ध भएका थिए ।
